回轉壽司

昨天和女友於旺角行街街，想食壽司，行過去鼓油街板前，嘩！嚇死你，幾十人係出面，門口派飛個姐姐問佢等幾耐又話唔知，激鬼氣！跟住同圍搵食，有個人派片話有間新開既回轉壽司叫御家壽司，仲有八折優惠，個派片既妹妹仲話帶埋我地上去，好，就去睇下咩環境！間野係山東街瓊華中心10樓，一入到lift，見到個水牌，咦，原來係Neway的集團成員，同女友你眼望我眼，卡拉ok開壽司鋪，得唔得架.....lift門一開，嘩！咁鬼大既！門口接待既妹妹問我地幾多位，食唔食煙！嘩！勁喎！可以食煙，雖然回轉位矛得食，不過都合理呀，拿拿臨走去住order卡位，裝修ok啦，日式feel囉，不過有d圓形梳化好搞笑，可以坐4-5個人，個背高過人頭，都幾私穩咁。打開餐牌，依...ok喎，選擇同價錢同板前差唔多，同埋佢有好多廚房野食，炸野、炒飯、拉面、串燒咁，好，試下你個三文魚先，$9雞，再order左海膽軍艦、牡丹蝦壽司、劍魚刺身(女友最愛)、軟殼蟹手卷，好！食住先！野食上檯速度快，因為唔係爆晒場，嘩！三文魚係抵食喎，同埋都好新鮮！海膽幾鮮甜，牡丹蝦20蚊比想像中正，因為感覺都好新解，劍魚ok，軟殼蟹又夠脆喎，好！食完再點左幾他廚房野同壽司，整體水準都唔錯，埋單，因為有八折，2個人$196！ok喎！仲有佢有個薰衣草既壽司飯，你知我地呢d後生仔，緊係試新野啦！食落粒飯里面有d薰衣草既籽(我估)，有一陣陣花味咁，不過同件魚生又唔撞架喎d味，我女友覺得好正好有創意，始終呢d野都係sell女仔既！嘿嘿！差d比佢入我位，話矛送花比佢，我話送番粒薰衣草飯比你啦 嘿嘿！走果時，個待應派咭片比我地，話可以打電話訂位，同埋原來銅鑼灣都有一間，係祟光隔離，不過我地呢d九龍仔，小過香港架啦，下次板前矛位，呢間御家都係一個幾好既選擇！估唔到Neway開回轉壽司都得，大公司即係大公司！哈哈！唔知食完壽司去唱k，有矛著數呢？=P